"Sədərək Yusif"lə sahibkar arasında 300 min manatlıq qalmaqal davam edir
"Sədərək" Ticarət Mərkəzinin sahibi Yusif Qədimbəyli ilə sahibkar Arazxan Nəcəfov arasında 300 min manatlıq qalmaqal davam edir.
Qaynarinfo xəbər verir ki, Yusif Qədimbəyli və qardaşları - Yunis Qədimbəyli ilə Ənvər Qədimovu məhkəməyə verən Arazxan Nəcəfovun iddiası birinci məhkəmə instansiyası tərəfindən təmin edilməyib. Məlumat üçün deyək ki, işə Nəsimi Rayon Məhkəməsində baxılıb.
Arazxan Nəcəfov qərardan apellyasiya şikayəti verib. Onun şikayətinə Bakı Apellyasiya Məhkəməsində baxılacaq. Fuad Babayev iş üzrə hakim təyin edilib.
Arazxan Nəcəfov "Sədərək" Ticarət Mərkəzində icarədar olub. O, sözügedən ticarət mərkəzində 20 il mağaza işlədib. Devalvasiya zamanı onun biznesində problemlər yaranmağa başlayıb. Arazxan Nəcəfovun "Sədərək" Ticarət Mərkəzinin rəhbərliyinə 30 min manat borcu yaranıb.
Sahibkar mediada açıqlamasında deyib ki, Yusif Qədimbəylinin adamları bundan istifadə edərək onun mağazasını qapadıb. Mağazada 300 min manat dəyərində olan malı isə ələ keçiriblər.
Arazxan Nəcəfov malları geri istəsə də, qarşı tərəf qaytarmaqdan imtina edib. Onun məsələni ictimailəşdirməsi də nəticə verəməyib. Çarəsiz qalam sahibkar məhkəməyə üz tutub.
